率直爽朗！短髮新娘氣質不減

短髮女生一向畀人清爽俐落嘅感覺，但講到做新娘嘛，留短髮就擔心大婚造型唔夠百變，又怕唔夠氣質。其實只要轉個髮色、加埋電髮夾同嘅綁髮技巧，都可以塑造出唔同風格。一齊睇睇 MakeupGU 同Ricko Chiu 點樣幫短髮新娘變身！

率直爽朗！短髮新娘氣質不減
邊個話新娘一定要染啡色長髮？呢位有個性嘅新娘子刻意染blue back，令皮膚更顯白，MakeupGU再幫佢綁起小馬尾，活潑而充滿氣質。

MakeupGU建議髮色偏淺或髮量較少嘅新娘，考慮輕鬆波浪髮型。無論係左圖嘅側分造型，抑或右圖嘅all back，整個髮型俐落得嚟有流動感、層次感，增加新娘子五官同輪廓嘅立體感，整個人望落去更sharp 更神彩飛揚。

新娘敬酒時通常會戴好多金器，所以敬酒時嘅髮型應該要以簡約為主，以免太over，反而氣質扣分。側分髮型自然時尚，如果想可愛D，MakeupGU建議喺頭頂束小鬢辮，豐富層次感，無論任何角度影相，新娘子都優雅自然。

Keep住直髮加少少梨花頭，帶點韓式味道。Ricko幫新娘綁個公主頭，再喺髮側插上鮮花頭花點綴，率性純真。

頭髮及肩嘅新娘，玩法就可以多D。Ricko話圖中呢個浪漫髮型，簡簡單單3個step：
1. 頭頂摷鬆
2. 隨意編綁三股辮
3. 插上華麗頭飾，氣質度即刻提升！

最後，Ricko提醒短髮新娘，試妝時頭髮長度未必同婚禮當日一樣，所以定預早跟MUA溝通，講好理想長度及層次，確保婚禮當日頭髮唔會太長或太短、太碎或太厚。婚禮前夕亦一定要洗頭，將頭髮吹鬆，方便翌日set髮，不易扁塌。